Oгeнь на околїску шмециска у Червинки, заняти ЯКП „Водовод“ на терену
31.07.2024
На шмециску у Червинки вибил огень. Тот инцидент ше случел и прешлого року, кед зоз начасову реакцию надпатраюцих службох є положени под контролу. И тераз, як и теди, екипи на терену и попри огню ше боря и зоз витром хтори досц очежује санацию. Запошлєни у ЯКП „Водовод“ константно анґажовани на гашеню огня, а зоз свою механизацию и людством до помоци пришло и Добродзечне огньогасне друштво „Крушчич“. Директор ЯКП „Водовод“ Милян Драшкович гварел же постоя два теориї прецо пришло до тей нємилей ситуациї: перше то хемийни процес розпадованя орґанского отпаду, док друга теория то людски фактор. Драшкович ше задзековал и товаришом зоз Крушчичу на анґажованю и виражел наздаванє до будуцей реализациї проєкту Реґионалного центра за управянє отпадом у Ранчеву при Сомборе, зоз чим би ше таки инциденти зменшали на минимум: „Нажаль, поново зне на истей локациї як и прешлого року. До огню на шмециску приходзи пре два фактори. Перши фактор то людски, зоз намиру поставени огень, цо нє муши буц случай. Други фактор хемийней природи, точнєйше у хемийним процесу розпадованя, насампредз орґанского отпаду, створя ше розлични файти гасох, насампредз метан хтори барз запалїви гас и мала жирячка може привесц до огня вельких розмирох. Хвильково нє можеме знац цо ше случело, алє нашо подприємство ту, як и вше, же би зоз своїма можлївосцами и средствами помогла санированє огня. На роботи гашеня анґажовани и машини наших кооперантох, як и людство и механизация Добродзечного огньогасногоп друштва „Крушчич“ хтори нам вше виду вочи у таких нєпредвидзених обставинох. Кельо сом видзел, досц того уж поробене, и векша часц огню загашена. Обчекуєме и наздаваме ше дижджу, хтора кед би спадла, верим до рана би нє було анї диму анї огню. Кед слово о потенциялних ришеньох за санацию шмециска, постоя два предложени ришеня. Перше, то комплетна санация шмециска, цо напевно вельки трошок. Тиж так, постої и друге ришенє, а то инсталованє такволаних „биотрнох“. То циви котри ше кладу директно од верху до дна шмециска. Теорийно то випатра досц єдноставне, алє то зложени поступок, почим тоти циви маю одвитуюци отвори през хтори преходза метални випарйованя. Приклад такей пракси маме у Ужицу. То ришенє хторе вимага вельки средства, та так би ше мушело уключиц висши инстанци власци. Тото цо за нас битне надпомнуц то же постої и идея о вибудови реґионалного шмециска у Сомбору, на Ранчеву на хторе би бул одношени отпад зоз цалого Заходнобачкого округу. Кельо сом упуцени, у Кули би була транзитна станїца, одкаль би ше шмеце одношело директо на Ранчево, зоз чим би бул ришени вельки проблем у домену комуналней дїялносци.„
