Oгeнь на околїску шмециска у Червинки, заняти ЯКП „Водовод“ на терену

На шмециску у Червинки у остатнїх даскельо мешаци явяю ше огнї, насампредз на околїску. Заняти ЯКП „Водовод“ на терену зоз доступну механизацию, а маю и вельку помоц Добродзечного огньогасного друштва „Крушчич“. Директор ЯКП „Водовод“ Милян Драшкович гварел же огень хтори бул пред пар мешацами охабел пошлїдки, и же специфичне тото же ше огень явя на околїску, а нє на самим верху шмециска. Тиж так, Драшкович наглашел же ше огень нє може прешириц прето же нєт активни огень, лєм дим хтори ше явя спорадично: „Огень хтори ше случел пред пар мешаци охабел пошлїдки у виду диму. Нашо подриємство ше зоз своїма средствами и можлївосцами бори процив того. Як можеме видзиц, ту на верху шмециска нєт огню анї диму а тото цо специфичне за нашо шмециско тото же воно високе и огень ше зявює на околїску, и чешко го санировац. Механизми зоз котрима ше нашо подприємство бори то розношенє шмеца хторе гори, же би цо скорей погорело, а тиж так залїваме зоз огньогасних цистернох, и задзековал бим ше Добродзечному огньогасному друштву „Крушчич“ на велькей помоци. Попри того, засипуєме жем по околїску и у тей роботи нам помогла цукровня, хтора по хто зна хтори раз зоз нашим подприємством робела за добре гражданох Червинки. Наздаваме ше же цо скорей ришиме проблем хавариї у виду диму. Сам огень ше нє може прешириц почим нє постої активни огень лєм дим хтори ше явя спорадично. Огень ше случел пред двома мешацами алє шмециско нє дими стално алє спорадично. Напевно, то нє треба най ше случує анї єден дзень алє огнї часта поява на шмецискох, так же ше наздаваме же и тот пошвидко санираме.„